Ils 15 d’avrigl 2014 ha la Svizra ratifitgà la Convenziun da l’ONU davart ils dretgs da las persunas cun impediments CRPD. Cun la ratificaziun ha la Svizra surpiglià tschertas obligaziuns: Ella sto proteger las persunas cun impediments cunter discriminaziun e promover lur integraziun e participaziun a la societad.
En Svizra vivan var 1,8 milliuns persunas cun in impediment. Circa in mez milliun persunas è restrenschì fermamain en il mintgadi. En Svizra na pon betg tut las persunas cun impediments viver ina vita cun ils medems dretgs. Quai ha blers differents motivs.
La finamira da la politica federala e chantunala per persunas cun impediments è quella da pussibilitar a las persunas cun impediments da sa participar cumplainamain, en moda autonoma e cun ils medems dretgs a la vita politica, economica, sociala e culturala. En il center stat adina la persuna pertutgada cun sias abilitads, ses potenzial da svilup e ses basegns.
Ils Dis d’acziun han cumenzà l’onn 2022 cun in pitschen project da pilot en il chantun Turitg. L’Uffizi social dal chantun Turitg KSA e la Conferenza da persunas cun impediments dal chantun Turitg BKZ han quella giada dà clers impuls per promover la realisaziun da la CRPD en il chantun. Il project è vegnì sustegnì da l’Uffizi federal per l’egualitad da persunas cun impediments UFPI. Grazia al success ed a l’interess pli e pli grond da las autoritads en numerus chantuns ed en bleras vischnancas, han la Conferenza da las directuras e dals directurs chantunals dals affars socials CDAS, il UFPI ed il chantun Turitg concludì da realisar l’onn 2024 ils Dis d’acziun per ils dretgs da las persunas cun impediments sin plaun naziunal.
Ils emprims Dis d’acziun naziunals per ils dretgs da las persunas cun impediments han gì lieu dals 15 da matg fin ils 15 da zercladur 2024 ed han mess en l’entir pajais in signal impurtant per ils dretgs da las persunas cun impediments en Svizra. En tut ils chantuns han autoritads e persunas privatas organisà occurrenzas ch’èn stadas accessiblas ad in grond public. Tut en tut han ins planisà e realisà ensemen passa 1000 acziuns. Qua vai tar ils videoclips e tar las impressiuns, tar il dossier da medias e tar il rapport d’evaluaziun da l’onn 2024: