Durant in mais han lieu en Svizra acziuns che gidan a realisar la Convenziun da l’ONU davart ils dretgs dals umans cun impediments. As participai e planisai er Vus in’acziun. As infurmai davart las activitads en Voss chantun.
Il project vegn sustegnì da l’Uffizi federal per l’egualitad da persunas cun impediments UFPI e da la Conferenza da las directuras e dals directurs chantunals dals affars socials CDAS.
Ils 15 da matg 2014 è entrada en vigur en Svizra la Convenziun da l’ONU per ils dretgs da las persunas cun impediments. Quai è per nus ina raschun impurtanta per festivar ed er per daventar activs!
Durant ils dis d’acziun vulain nus far attent als dretgs da las persunas cun impediments. Nossa finamira è in avegnir inclusiv.
- Ils 15 da matg 2024 cumenzan en tut la Svizra ils Dis d’acziun naziunals per ils dretgs da persunas cun impediments.
- La festa da finiziun dals Dis d’acziun naziunals per ils dretgs da las persunas cun impediments han lieu ils 15 da zercladur 2024 en il chantun Genevra.
Communicaziun a las medias 25 d’avrigl 2024
Dis d’acziun naziunals per ils dretgs da las persunas cun impediments dals 15 da matg fin ils 15 da zercladur 2024
La Svizra festivescha 20 onns Lescha davart l’egualitad da persunas cun impediments e 10 onns Convenziun da l’ONU davart ils dretgs da las persunas cun impediments. Dapertut han lieu acziuns per la populaziun. Quellas vegnan iniziadas ed organisadas da persunas cun impediments e da lur organisaziuns sco er d’autoritads. La Svizra metta uschia in ferm signal per l’egualitad, la participaziun e l’accessibladad. Ulteriuras infurmaziuns davart il mais d’acziun e davart il program chattais Vus sin la pagina d’internet https://futur-inclusiun.ch/.
Durant il mais d’acziun per ils dretgs da las persunas cun impediments han lieu en l’entira Svizra passa 1000 acziuns. Ils motivs èn il giubileum da 20 onns da la Lescha davart l’egualitad da persunas cun impediments en Svizra sco er il giubileum da 10 onns da la Convenziun da l’ONU davart ils dretgs da las persunas cun impediments. Planisadas èn acziuns sco speeddating, curs intensivs da la lingua da segns, visitas guidadas inclusivas da museums e da citads, sessiuns chantunalas da persunas cun impediments, jogging per persunas tschorvas u navigar a vela inclusiv sur il Lai da Constanza. Ellas envidan las persunas cun impediments da participar e sveglian en la publicitad ina conscienza per l’impurtanza dals dretgs da persunas cun impediments. Uschia prestan ellas ina contribuziun per realisar la Convenziun da l’ONU davart ils dretgs da las persunas cun impediments.
Ils partenaris da las acziuns èn numerus: da la partida èn il maun public, l’economia locala, instituziuns culturalas, uniuns, scolas autas, baselgias, organisaziuns ed instituziuns da persunas cun impediments. Il project vegn sustegnì da l’Uffizi federal per l’egualitad da persunas cun impediments UFPI e da la Conferenza da las directuras e dals directurs chantunals dals affars socials CDAS.
Ils 15 da matg envidan l’Uffizi dal servetsch social da Turitg e la Conferenza da las persunas cun impediments dal chantun Turitg ad ina festa d’avertura per il cumenzament dals Dis d’acziun a Turitg. La festa da finiziun ha lieu ils 15 da zercladur 2024 cun la cussegliera federala Elisabeth Baume-Schneider en il chantun Genevra. Il program sco er tut las ulteriuras infurmaziuns davart ils Dis d’acziun per ils dretgs da las persunas cun impediments chattais Vus sut https://futur-inclusiun.ch/.
► Collavuraturas e collavuraturs da las medias pon s’annunziar per tut las occurrenzas.
Ulteriuras infurmaziuns: https://futur-inclusiun.ch/
Contact/dumondas:
Giulia Brogini (direcziun generala dal project), Uffizi federal per l’egualitad da persunas cun impediments UFPI, giulia.brogini@gs-edi.admin.ch, +41 79 322 19 70
Gaby Szöllösy, secretaria generala CDAS, gaby.szoelloesy@sodk.ch, +41 76 336 47 98
Bernhard Krauss (annunzias per la festa d’avertura dals 15 da matg 2024 a Turitg), manader dal Post da coordinaziun per ils dretgs da las persunas cun impediments dal chantun Turitg, bernhard.krauss@sa.zh.ch, +41 79 756 75 06
Bernard Favre (annunzias per l’occurrenza da finiziun dals 15 da zercladur 2024 a Genevra), directur dal pol handicaps, republica e chantun Genevra, WW1WeWJtRnlaQzVtWVhaeVpTVTBNR1YwWVhRdVoyVXVZMmc9 +41 79 215 80 58