Suenter il success da l’onn 2024 cun passa 1000 acziuns en l’entira Svizra han puspè lieu ils Dis d’acziun naziunals per ils dretgs da las persunas cun impediments, e quai dals 24 da matg fin ils 7 da zercladur 2027. En tut ils chantuns organiseschan autoritads e persunas privatas bleras differentas acziuns sut il motto «Futur inclusiun – Ensemen a la lavur». Il sectur da vita «lavur» è impurtant per tut ils umans. In ambient da lavur inclusiv gida a rinforzar la coesiun sociala e mussa las abilitads ed ils talents da mintga singula e singul.
Sut il motto «Futur inclusiun – Ensemen a la lavur» vegn il focus mess sin persunas cun impediments e sin lur ambient – sin persunas ch’èn activas sco emploiadas ed emploiads, patrunas e patruns, persunas che tschertgan ina plazza u che s’engaschan en la lavur voluntara u en ils lavuratoris. Persunas cun e senza impediments sco er lur abilitads e talents stattan en il center da la campagna. En bleras acziuns umoristicas, aventurusas, infurmativas, placativas, creativas, immersivas ed inspirantas sclerin nus per exempel las suandantas dumondas:
- Scolaziun e martgà da lavur: Co èn quests dus secturs colliads in cun l’auter e co reusseschi da midar d’in sectur a l’auter?
- Tecnologias assistivas: Co sa sviluppa il mund professiunal vinavant?
- Mesiras adequatas: Tge è manegià cun quai?
- Federaziuns da branscha: Co tractan ellas il potenzial da lavur da las persunas cun impediments – datti recepts da success?
- Barrieras: Cun tge obstachels vegnan las persunas cun impediments confruntadas en connex cun la tschertga d’ina plazza, cun la recrutaziun e cun la planisaziun da la carriera?
- Intelligenza artifiziala: Tge resursas èn tuttina indispensablas per il martgà da lavur?
- Pensiunament: Sa tschentan per las persunas cun e senza impediments las medemas dumondas?
- Lavuratoris: Co reageschan els sin midadas da la dumonda en l’economia: èn recicladi, lavur en iert e gastronomia nischas dal martgà?
- Permeabilitad: Co stgaffin nus meglras colliaziuns tranter l’emprim ed il segund martgà da lavur?
- Medem salari: Tge pensain nus, sche nus udin la frasa «la medema paja per la medema lavur»?
- Communicaziun: Co discurrin nus davart impediments a la plazza da lavur?
- Clientas e clients: Co tract jau persunas ch’èn neurodiversas, tschorvas, surdas u en la sutga cun rodas?
Las acziuns duain pussibilitar novs inscunters tranter persunas cun e senza impediments e gidar a reducir pregiudizis. Per participar stuais Vus ademplir trais criteris:
- Mintga acziun ha in connex direct cun la Convenziun davart ils dretgs da las persunas cun impediments CRPD, ch’è vegnida suttascritta da la Svizra.
- Persunas cun impediments vegnan includidas en las acziuns. En il cas ideal a chaschun da la planisaziun, da l’organisaziun e da la realisaziun.
- Las acziuns èn accessiblas, sche pussaivel, per tut las gruppas da persunas cun impediments.
Ils Dis d’acziun vegnan realisads da tut ils chantuns e coordinads da la Confederaziun, da l’Uffizi federal per l’egualitad da persunas cun impediments UFPI e da la Conferenza da las directuras e dals directurs chantunals dals affars socials CDAS.
Contact / dumondas:
Giulia Brogini, substituta dal manader da l’Uffizi federal per l’egualitad da persunas cun impediments UFPI, WjJsMWJHbGhMbUp5YjJkcGJta2xOREJuY3kxbFpHa3VZV1J0YVc0dVkyZz0=, +41 58 464 12 83
Carmen Rouiller-Zbinden, manadra dal sectur Persunas cun impediments tar il Secretariat general da la Conferenza da las directuras e dals directurs chantunals dals affars socials CDAS, WTJGeWJXVnVMbkp2ZFdsc2JHVnlKVFF3YzI5a2F5NWphQT09, +41 31 320 29 93