Dals 15 da matg fin ils 15 da zercladur 2024 han lieu dis d’acziun sut la devisa «Futur Inclusiun» en l’entira Svizra, er en il cantun Grischun.
Vivai l’inclusiun. Visitai ina da las numerusas acziuns en il Grischun. Vus pudais eleger da passa 40 occurrenzas. Cun las acziuns prestan interpresas, instituziuns e la societad civila da l’entir Grischun ina contribuziun custaivla per promover l’integraziun.
La finamira
La finamira dals Dis d’acziun è quella, da mussar a la vasta populaziun, co ch’il futur inclusiv po sa preschentar e vegnir realisà en differents secturs da la vita. Cun differents temas, sco per exempel l’access al sport ed a la cultura, l’inclusiun en il turissem, en la furmaziun u en la lavur, duai vegnir promovida la sensibilisaziun dals uffants e da las persunas creschidas
Connex da l’occurrenza
L’onn 2024 è in onn impurtant per ils dretgs da las persunas cun impediments en Svizra. Da festivar datti gist dus terms impurtants sin la via a l’inclusiun da las persunas cun impediments.
La Convenziun da l’ONU davart ils dretgs da las persunas cun impediments(CRPD) è en vigur en Svizra dapi l’onn 2014. La Lescha davart l’egualitad da persunas cun impediments (LImp) è ina basa giuridica impurtanta gia dapi il 2004. L’intent da la CRPD e da la LImp è quel da promover, da proteger e da garantir il giudiment egual dals dretgs umans e da las libertads fundamentalas per tut las persunas cun impediments sco er da promover il respect da lur dignitad. La Confederaziun, ils chantuns e las vischnancas èn obligads da realisar la CRPD e la LImp.
En il rom dals giubileums vulain nus dar in stausch a la realisaziun dals dretgs umans, agir cuminaivlamain e render visiblas las bunas praticas.