Tgi essan nus?
L’uffizi chantunal dal servetsch social dal Grischun (USo) s’engascha per la segirezza sociala e per l’integraziun. Er umans cun impediments duain pudair manar ina vita ch’è determinada dals princips da l’autodeterminaziun e da la participaziun.
Ils dis d’ acziun naziunals dals dretgs da persunas cun impediments 2024 èn vegnids coordinads e manads dal biro federal per l’egualitad da persunas cun impediments (UFPI). La Conferenza da las directuras e dals directurs chantunals dals affars socials (CDAS) sustegna l’avischinaziun participativa da questa campagna e la resguarda sco med impurtant per sensibilisar la publicitad en Svizra per ils interess da las persunas cun impediments.
Pertge tut quai?
La Convenziun da l’ONU davart ils dretgs da las persunas cun impediments (CRPD) n’è betg in exercizi, mabain in’obligaziun. Per realisar la CRPD dovri dentant ina vasta allianza. Ils dis d’acziun ans permettan da derasar quest tema en la vasta publicitad.
Tge è nossa visiun?
Las persunas cun impediments han ils medems dretgs sco tut ils auters! Nus ans engaschain per quai. Las persunas cun impediments duain pudair duvrar il traffic public en moda spontana ed autonoma: sco tuts. Ellas duain pudair participar ad occurrenzas da temp liber, culturalas e da sport: sco tuts. E sco tuts duain er las persunas cun impediments avair il medem access a la furmaziun, als fatgs da sanadad, al martgà da lavur, al spazi d’abitar ed als negozis sco er a l’infurmaziun ed a la communicaziun. Perquai che gist uschia è quai francà en la Convenziun da l’ONU davart ils dretgs da las persunas cun impediments. Questa convenziun ha la Svizra suttascrit ed ella è lianta dapi l’onn 2014.
Tge èn nossas finamiras?
Ils dis d’acziun dattan la pussaivladad da mussar a la publicitad mesiras novas, gia planisadas u gia realisadas, che megliereschan las realitads da vita da las persunas cun impediments. La mesiras duain influenzar en moda positiva l’agenda politica. Durant las acziuns pon ils obstachels vegnir fatgs visibels e palpabels. A medem temp duain vegnir intermediadas enconuschientschas praticas per chattar soluziuns sistematicas e persistentas. En quest connex èsi essenzial da disponer d’ina rait multifara ed abla d’agir. Per questa rait vegnan creads instruments da barat e messas a disposiziun purschidas da sustegn.
Tge èn noss criteris da qualitad?
Nus pretendain che las acziuns hajan ina relaziun cun la CRPD, ch’ellas garanteschian l’inclusiun da las persunas cun impediments e ch’ellas segireschian l’access egual per tuts.