En il rom dals dis d’acziun per ils dretgs da persunas cun impediments organiseschan l’Uffizi da l’AI dal Grischun e la Scola professiunala PrA Grischun ina sairada cun differents puncts culminants.
Furmaziuns professiunalas han ina gronda impurtanza en Svizra. La Convenziun da l’ONU davart ils dretgs da persunas cun impediments garantescha ad umans cun ina restricziun da la sanadad il dretg sin ina furmaziun professiunala. Pervia da lur restricziun da la sanadad na san betg tut ils giuvenils absolver ina furmaziun professiunala da basa cun in attestat federal professiunal AFP u cun in attestat federal da qualificaziun AFQ.
L’Uffizi da l’AI dal Grischun sustegna giuvenils cun ina restricziun da la sanadad. El pussibilitescha ad els ina furmaziun pratica professiunala. En quel connex collavura el cun manaschis da scolaziun sin l’emprim martgà da lavur, cun instituziuns e cun la Scola professiunala PrA dal Center per pedagogia speziala Giuvaulta.
Las cussegliadras ed ils cussegliaders professiunals da l’Uffizi da l’AI ed emprendistas ed emprendists da la Scola professiunala PrA organiseschan ils 28 da matg 2024 ina sairada cun ina vernissascha, in film curt, ina premiera musicala ed in apero.
